|
Na Tolbert Edait
ESUPAN abootin kanuka Miria Kalule Obote nakopate loka UPC na ebwoi aseunio araun president, Akbar Adoko Nekyon nges etijena ebe mam bobo UPC ebongokini aigang Dr Kizza Besigye lo Forum for Democratic Changes (FDC) aseunio araun president kwa okaru 2001 naarai arai aleya na abeikit UPC.
Enera Nekyon araasi 30.12.2005 ko Kumi Township PS. Abala ngesi ebe abu Besigye lo aupasi ka opajanake (Nekyon), Sam Akaki, ipejokisi nges koreke lo Naguru, Kampala erongo icimara; aikanikanitoi ebe igang UPC ngesi.
“Abu eong ekenyanak ngesi, Besigye, akii toma ebe emamei nen, alea. Kolejet apotu isio UPC egangata ijo 2001, abu ijo kolatak isio kwap, kokeri ijo South Africa,” abala Nekyon.
“Mere ngun bon, abu da eong ekwenya Besigye ejok noi abala ebe, arai bobo ejai ipatei luce aibumakin aigang ediopet epate ekot korai UPC nes ebeit alea,” eyatakit Nekyon.
Abala Nekyon ebe emunono UPC kosiana, abu kocam aiganga irwan aarei ipatei iarei; Democrati Party (DP) kede FDC kanu ti aukor President Museveni, konye lolo kana ekapakina UPC bon airiong ajokot kanuke.
“Apotu isio egangata Dr Paul Ssemongerere lo DP 1996 akaul ekesaje aibukaar isio ebe ekotos ngesi luko Buganda, konye nu ican apotu Imugaana kosekata Museveni,” abala Nekyon.
“Bobo 2001 kobuni Besigye da elosi kokupup baba ebala ebe igangitos ngesi isirikaalei luka UPDF 99 kangul 100, kosodi bobo UPC aigang. Toni (Chapaa) Karuhanga lo G6 kanu aimorikikin na ipatei abu kobunite. Apotu alimokisi ngesi da ebe arai erai UPC caat,” abala Nekyon.
Itunga anya anya kes ediara aipup einer ke Miria, lu epu kes araasi lu ikaru 35-80. Icie konapitos igoen lu ajai aputo ke Dr Apollo Milton Obote.
Abu Miria kopegak nu ebalare ebe igangit ngesi FDC aitutub Dr Kiiza Besigye.
“Erai ngin aisab, na ewadikatai apapulai toni oyemuto ebe auta eong aisup abootin kegangite FDC aitutub Besgiye. Abwoi eong kanuka UPC anyamar epresident, eong alopet, mere icie,” abala Miria.
“Koseutu eong. Eong bon aberu, mam eong ajeni ecelet, ejie, akoko karaida adakit emuudu; konye ajok eong kede einer ka aingarenikin yesi kede UPC kwape kolo okilenika Obote,” abala Miria.
Published on: Friday, 13th January, 2006
|
