|
Ediata etepegak apugan korotin
Na Felix Osujo ka James Odongo
Ipolisin luko Soroti kes arocutu itunga lu edeparete itomon kanu aitolot aidiya korotin luko taun loko Soroti komam ingisitos apedor kane ejai polis.
Imoriaritos lu arocun lo ikila abwa kanu aseuno kwape MP lo oboma Soroti, Moses Okia Attan, aegirigiran na angaleu ka asioman ko kansulo lo Soroti, Beatrice Anyumel, ekansila lo LC4 Campswahili, Honorant Okello loda bobo erai atupiton apolon eicolong loka FDC kotaun kalo Soroti.
Icie kes ekansila lo atumunak kotaun kalo Soroti korai da bobo egirigiran lo apiyai ko Soroti Municipal Council, Isaac Opolot, akansila naka LC3 nako Kengere Ward Jocelyn Icoot.
Icie lu ikamunitai kes aberu na ebe Apio Bena Mariam ka Paul Okiring. Ekodet loka itunga luda emoriaritos ibodabodan kes ediaete kotoma okodet lo ejena kwape National Alliance for Free and Fair Election.
Ekotos kesi ebe kolemarai apolon eicolong lo erionget lo aseo, Eng. Badru Kiggundu. “Ikoto isio aseo na itolosio ejok,”
“Erai Kiggundu amorosit toma oipugae loka democracy,” “Ejaiki Kiggundu Uganda epusi etuan lo edeka ariebo na amumut kede democrase,”
“Ekoto Kiggundu konyou koyapesi,” asiomas acie kotoma akiro nu ewadikatai apapulai nu ekeitos ediyak lu.
Konye nepe eyapiarete kesi adukena nu apolok nu edistrkt lo Soroti, apotu ipolisin kitikokisi kesi kotenyun bodo eigur.
“Emamete bobo akiro acie kere, erai na aidia kanu aseo na ecai naarai etarau President Museveni Kiggundu ebela ke loitabia, ekoto Kiggundu konyou koyapesi katipet noi,” abala Okia koutas Ipolisin aidilidilar nges awenis nako polis.
Apolokiton Ipolisin koyaite akidingot nako Teso, Alison Agaba nges abu kolimok Etop ebe mam ediak lu engitunitos apedor na aitolot aidia kec ido ebe arai abilit ekisil kesi aidia.
Published on: Thursday, 29th July, 2010
|
