|
Na Felix Osujo ka James Odongo
Al-Shabaab: Edepun 23 ko Soroti
Itunga 23 lu kimoriaritos Isomalin kaluce luda pac abu epotolo lo amwana kilologau kotaun kalo Soroti kanu angarakin lu ayuara aingic akiro nu ikamanara ka akapilanut na alomakinatar akirosinei icie nuka opdwaratau atakanunun kes ayanyangar Kampala.
Eraasi ngun akiro nu etijenasi luapolok ko polis. Abalasi ipolisin ebe ikamitai itunga ngun lu imoriaritos Isomalin ka icie lu Uganda ebe kaiboisio nu egelegela kotaun kalo Soroti.
Ekamuno lu kotoma opotolo lo etolosete Ipolisin kosabiti lo atubor. Lu ikamunitai kes adaun ayangar Kampala kanu abongonokin aingiseta.
Iboomun kesi apotu kobuloros ko Kyadondo Rugby Club ko Lugogo kede Ethiopian Restaurant ko Kabalagala araasi 11.7.2010 kosodete itunga 76 atwakare.
Abenyak luka al-Shabaab luko Somalia kes apotu kolimosi ebe kesi apotu koduosi iboomun ngun kanu ebe ejatar ajoresio nuko Uganda Somalia aidar aipuc.
Itijenarit Agaba ebe epotolo lo ekamere itunga ngun nes etolosete luka Joint Anti Terrorism Unit lu aponitos ko Kampala Naiwongonet kosabiti kalo atubor.
Abala ipolisin lu ebe itunga ngun kes etodoli oyapesin luka Anti Terrorism Unit. Kampala kanu aingarakin lu ayuara aiyatakit keda aingic kec.
Itijenaritai ebe itunga ngun luipu kes amamete keda lem aswamisinei kosodi icie kes ebe ajatar aswamisio kec nu adumunitos bonik.
Apolon eicolong LC1 lo Cell G, Ghanim Suleiman ngesi abu kitijena ebe icie ko otunga kangun ekamar ebe araasi lu edumunitai ko cell ke.
Ediope lo ebe, Juma Mbarak nges abu kolimok Etop ebe aponi okooke dakicimarai.
Aeraban naka Police ko Uganda, Judith Nabakoba nges abu kolimok Etop ko osimu ebe mam ber adumunit akiro nu aikamuno naka itunga angun kosodi alimokin etop ainerakin kede apolokiton loka aingic ko Police (Director of CID), Edward Ochom.
Konye Ochom nges abu kolimok Etop kosimu ainomakin aeraban naka Police, Judith Nabakoba esimu kanu ajenun nu aidules, konye tai.
Published on: Thursday, 29th July, 2010
|
