|
Atola apolon eicolong loka SMC akio kanu eyapeesi
Na Lawrence Ilakut
AURIANET na ainget ekaru (AGM) nako St Charles Boromeo Akulony Atutur, Kumi nesi abu kobwou akaulo na eigur abwangun toni apolon eicolong SMC, Simon Ekoot aibotaar aol aimony.
Alomunete nu nape itegearo aseo na apolon eicolong loka SMC kosodi na kolo arai CAO ko Kumi, Rose Ocom atemar ebe ekot yen eseunio kodolite S.4 kwa ipudar ekisil.
Ocom alimun ngun bon korengeunete Ekoot akonye ka acuriar Ocom kobala ebe itokokolit ngin ngesi.
Abala ebe ayauni caat Ocom aturakita aukoria ngesi koicolong ke.
“Eswama eong nuipu ageun ne kolo ageunor esomero lo ido emamei ibore akurokit eong konye lolo apotu itunga alemar eong,” abala Ekoot koracitos akio itoni angor aarei anyoun koicolong kec kosodete arikor nges kinga konyounete itunga ariariat. Mam ber bobo aurianet abu kikunyak toni DEO, Charles Okol anyoun kosodi aisinapikin itunga ka aigaligal enerak.
Apotu do bobo itunga kinyakakisi Ekoot konye ebeit ekansulo lo otem aitigogong ikiroria lu ijukario Kampala kotupitete apapulai nu asioman.
Acie kotoma akiro nuapotu bobo koyautu eiri nesi nu abu apolon esomero kocak kiding nauriak kobala ebe aisisia kosomero kalo nesi ajokunar noi konye ekaditos atukono akanyauni nede ekotor auriak adukun kes.
Published on: Friday, 5th February, 2010
|
