|
Na Godfrey OjoreM
AKIRO nu esisiak lu atukot na S.4 kotoma okaru 2009, kes itodunit ebe ibiroro esisiak. Idwe 14067 kes eboikina aingito na ko Teso kere konye idwe 618 bon apotu opedosi aitub kotoma adoketait nasodit.
Ko Teso kere Soroti nes ingarenit kede esisiak 209 otupakini Kumi kede esisiak 50 bon aitub kotoma adoketait nasodit.
Karaida ikeuna enaba lo esisiak lu etubitos ko Soroti, konye ko Kumi nes abu enaba kodokaria kuju kitiriani kede ekaru 2008 ne apotu esisiak 56 odesiaratar aitub kotoma adkoetait nasodit.
Abu ekalamu lolo ikarak inacan wok lu Katakwi ne apotu esisiak 2 bon ikwadakinotor aitub. Okaru lo 2008 etutubit Katakwi idwe 4 kosodi Bukedea ne atamit aikeun akou nes lolo bobo ecikakin kwap.
Idwe 10 kes apotu otuboto itiriani kede idwe 17 lu apotu iliyata okaru 2008. Amuria nes itutubit idwe 10 ibore da itodunit aikeun kede esisiak iwongon.
Idwe 55 luka idunyeta wok lu Pallisa kes apotu otuboto osodi Tororo nes apotu idwe 280 odipotor aitub kotoma adoketait nasodit.
Isideleleunitos akiro nu ebe apotu isap icakutu ainacan kec kwape elwanat noi. Kotoma odistrcitan lu Amuria ka Kaberemaido amamei apese na abu opedo aitub kotoma adoketait nasodit.
Kotoma aingtio kana emamai esomero ko Teso lo ikisaritai akiro kec ka aponi ikisarere akiro nu isomeron ice kotoma Primary Leaving Examination (PLE) ko Teso.
Kanu akiro nupo ikamanara kede akoko nes abu UNEB ikisara akiro nu esisiak 1,240 ko Uganda kere.
Idwe lu edolit enaba kec 745 kes apotu ibiroros akeje kuju ko Teso komam epedorete da alomar esomero ece kere karaida alomar toma osomero lo itutuonoere itunga aswam ikoosin lu egelelelga.
Esisiak lu edolit enaba kec 12,704, kes etubitos, ido ice lu mam epedorete alomar asioman nako sinia kes epedorete alomar aswam ikoosin luko technical.
Esinyikokit aminista na aisisia kede aboliasio, Namirembe Bitamazire idwe lu mam epedorete aiyatakit kede asioman kec ingaren alomar osomeron lu etatai naarai ejai adumun toma.
"Ajeni eong ebe ejasi idwe lu emamekitos isirigin kanu aiyatakina asioman, konye ipedoerte yesi alomar TTC, Technical," ecori Bitamazire.
Eigirigian lo UNEB Mathew Bukenya, nes abala ebe ibiror idwe lu ipu kanu mam emisikitotor amusugun ejok kede acoa na itosomatar iboro luka sciences ka amamus na laboratories kotoma osomeron ice.
Kaurianut ekoni neta eipone lo apotu idistritan lu Teso iswamatoror:
Katakwi: Dv1: 2 (0.5%), Dv2: 55 (12.8%), Dv3:127.(29.0%) enaba lo esisiak ere lu eboikina nes arai 438, Kumi: Dv1 50 (2.6%), D2: 295 (15.5%), Dv3: 671 (35.2%) enaba lo esisiak lu ewadikauna nes arai 1932, Pallisa: Dv1: 55 (2.2%), Dv2: 335(13.4%), Dv3: 728(29.1%), Soroti: Dv1: 209 (5.5), Dv2: 800(20.9%), Dv3: 1189 (31.1%), Tororo: Dv1: 280 (8.2%), Dv2: 654(19.2%), Dv3: 8819(25.9%), Kaberamaido: Dv1: 2 (0.3%) Dv2: 73 (10.7%), Dv3:210 (30.7%), Amuria: Dv1: 1091.9%), Dv2: 64 (11.9%), Dv3: 191 (35.4%) ogolokini Bukedea koipone kalota: Dv1: 1.7%), Dv2: 81 (13.8%), Dv3: (204(34.8%).
Published on: Friday, 5th February, 2010
|
